يوميات طبيب طوارئ.. انفد بجلدك!!
القاهرة – النخبة:
✍ يرويها دكتور عبدالحسيب وفا Hasabo Wafa
قاعد في أمان الله في استقبال المستشفى العام بدل واحد صاحبي – الله يحرقه ويحرق اللي يعمله خدمة – وكالعادة يعني شوية حالات زايدة على حادثتين وكام مغص كلوي،
وإذ فجأةً صراخ هستيري: الحقونا الواد بيموت، ببص وراي لقيت جيش من البلطجية داخلين عليّ بجثة صديقهم الباردة المتهلهلة، كسروا باب أوضة الطوارئ – مع إنه مفتوح والله – ورموا الجثة على السرير وسحبوني من هدومي حرفياً جابوني جنب العيان وقالولي الحقه يا دكتور، ما له يا جدعان؟ قالوا: مضروب بمطواة.
ببص على الواد لقيته شاب عشريني مطعون في قلبه مباشرة، جثة هامدة ولا نفس ولا نبض ولا أي بطيخ (جلاسكو كوما صفر😂) طبعاً محاط بزعيق أهله وشتايم بأسوأ الألفاظ بيدوروا على الأخصائي ومدير المستشفى وشتايم بقى +18 وتكسير في الأوضة وتهديد بقى لو الواد مات هنعمل وهنسوي وهنطلع تيت أبوكم ومش عارف إيه، أنا معرفش رجلي كانت شايلاني إزاي وسبحان من ثبتني في الموقف ده، ده كان أول مرة أتعرض لحاجة زي كده وكنت لوحدي تماماً مش معاي حد غير ممرضة والأمن عمل من بنها😂
كان يستحيل بأي حال من الأحوال إني أقولهم إن الولد مات، وطبعاً وشي كان جايب ألوان بس تماسكت كده وعملت نفسي بكشف عليه وبسمع ضربات قلبه وبحس النبض وكل اللي بيدور في دماغي هو إزاي أطلع من المبنى حي، أنا لو كنت قلتلهم ده ميت كانوا نيموني جنبه😃
قلت للممرضة ركبيله كانيولا – هي عارفة إني بمثل – وزعقت في أهل العيان اهدوا الواد كويس وفيه النفس وهنعلقله محاليل ويبقى كويس إن شاء الله،
– يعني يادكتور هيعيش؟
= آه يا باشا متقلقش
– طب فين تيت أم الأخصائي
= هروح أناديه أهو
خرجت من الأوضة مش مصدق نفسي وإيدي كلها دم، خبطت على دولا في أوضة الكشف فتحلي منشكح بابتسامته المعتادة قلتله العيان مات وهننضرب اجري، وكان فيه عيانين بيكشف عليهم طلعوا يجروا معانا والله🏃🏃
قابلنا أبو عبده جاي سعيد ومبتسم قلناله لف وارجع ثاني، أخذناه واستخبينا في مبنى الإدارة.
أهل المتوفي كسروا الطوارئ وكسروا عربية الإسعاف وبيدوروا علينا، جات عربيات الشرطة والأمن المركزي والأوضاع هديت، بعدها بخمساية كده طلعنا نبص لقينا أهله واخدينه على تروللي وأول ما شافوني شاوروا عليّ بيقولوا تعالى شوفلنا النبض يادكتور، طبعاً طلعت أجري وسبتهم وانهالت الشتائم من كل مكان علينا.
وأديني مستخبي مش عارف أروّح البيت وقلعت هدومي عشان محدش يعرفني، قال يعني تنكر😂
كلمة أخيرة: إنت يادMohamad Saad تنسى إن ليك صاحب اسمه عبدالحسيب وتمسح رقمي تماماً، الله يحرقك ويحرق نبطشياتك يافقر😒