قال مطرب المهرجانات عمر كمال: “أنا فيه حاجات لو رجع بيَّ الزمن تاني هغيرها وأخذت عهد على نفسي بكل أمانة إني مش هظهر تاني من راقصات وده وعد مع ربنا في آخر عمرة ليَّ”.
وأضاف خلال لقائه ببرنامج “برلمان شعب”: “أنا بعرف كويس جدًّا أعمل تريند وعندي منصاتي وقنواتي اللي تساعدني بس أنا عمري ما افتعلت مشكلة”.
وتابع: “أنا عندي 4 عربيات بفلوس كتير ومش محتاج اعمل تريند، أنا بحب أعمل شغلي ومش هدخل شغل بتريند، وطموحي كل أغنية ليَّ تعدي 100 مليون مشاهدة، وأغنيتي مع سمية الخشاب منجحتش وجابت 16 مليون مشاهدة بس لأنها خالفت اتفاقنا بشأن الخطة التسويقية”.
وأكمل: “أعترف إن ممكن يكون فيه ألفاظ في أغانيَّ مش مناسبة للأطفال بس احنا من قديم الأزل في أغاني تحمل إيحاءات جنسية، وطبيعة السوق اللي ماشي كده وفي غيرنا كبار أوي بيقولوا نفس كلماتنا، بس لو رجع بيا الزمن هغير مصطلحات زي خمور وحشيش ومفيش أي محتوي هنزله على العام فيه راقصات”.
وأكد: “مش مستعد أقابل ربنا دلوقتِ وحاسس إن ربنا هيديني مهلة كويسة بس أنا فيَّ خير ولو وقفت قدام ربنا وكلمته باللي في قلبي هيعدي لي كتير، واللي عملته كويس يمحي لي كتير والناس هتترحم عليَّ علشان أنا ما عملتش حاجة وحشة في حد”.
