بتشتري طبق البيض بكام؟ ، أكيد كل واحد سيجاوب ويقول سعر مختلف عن الآخر، فجميعنا نعرف موجة ارتفاع الاسعار الكبيرة في سعر البيض الفترة الماضية ولكن ما سر هذا الارتفاع ؟ تابعونا سنكشف الكثير من خلال هذا التقرير.
الحقيقة المصريين مش عارفين يلاقوها منين ولا منين وده لأن كل حاجة حولينا سعرها زاد تقريبًا، ودلوقتي بقينا بنسمع كل يوم عن زيادات جديدة في أسعار البيض.
طب ياترى إيه السبب؟
حسب تصريحات أحمد نبيل، رئيس شعبة البيض باتحاد منتجي الدواجن، قال إن الزيادات اللي حصلت بشكل متكرر في أسعار البيض في الأيام اللي فاتت كانت بسبب قلة المعروض من البيض.
ولو انت مش عارف فـ أسعار البيض ارتفعت بشكل متكرر في الأيام اللي فاتت، والمصريين اتفاجئو بزيادة ما بين 6 و12 جنيه للطبق الواحد وده من بداية شهر فبراير.
وحسب اخر سعر أعلن عنه اتحاد منتجي الدواجن على صفحته الرسمية على موقع التواصل الاجتماعي فيسبوك، فـ وصل سعر كرتونة البيض الأبيض النهاردة في المزرعة إلى 98.75 جنيه، بارتفاع جنيهين بالمقارنة بـ إمبارح.
أما سعر كرتونة البيض الأحمر فسجل 98.75 جنيه، بارتفاع جنيه، ووصل سعر كرتونة البيض البلدي لـ 115.75 جنيه، بارتفاع 3 جنيه مرة واحدة.
وأكد رئيس شعبة البيض باتحاد منتجي الدواجن إن الأوضاع عند منتجى الدواجن مش مستقرة خالص وده بسبب التذبذب اللي بقى موجود في أسعار الأعلاف.
ده كمان قال إنه لحد دلوقتي لسه سعر البيض موصلش لسعر التكلفة وأنه بيتباع في الأسواق بأقل من تكلفته، وده لأن التكلفة الحقيقية لطبق البيض بتوصل 104 جنيه، وده اللي أحبط المنتجين الفترة اللي فاتت.
قال “نبيل” كمان إن أسعار الأعلاف رجعت تزيد تاني وده لأن الإفراجات عنها في الموانىء رجع يقل من تاني.
وده اللي خلى سعر طن الصويا يزيد ويوصل لـ 30.5 ألف جنيه، و طن الذرة يسجل 15 ألف جنيه ، وطبعا دي مكونات أساسية لصناعة أعلاف الدواجن اللي بيحتاجها المنتجين.
وفي فبراير السنة اللي فاتت كان البنك المركزي أصدر قرارًا بوقف التعامل بمستندات التحصيل في كافة العمليات الاستيرادية والعمل بالاعتمادات المستندية بدلا منها، وده قبل قبل ما يرجع ويلغي القرار في نهاية 2022.
وده لأن المستوردون والصناع بقطاع الدواجن عانوا الفترة اللي فاتت من أزمة نقص مستلزمات الإنتاج وده بسبب تأخير فتح الاعتمادات المستندية، وبطء البنوك في تدبير الدولار ليهم.
وبرغم إن الدكتور مصطفى مدبولي أعلن مؤخرًا انتهاء مشكلة تكدس البضائع وعودة الأوضاع في الموانئ لطبيعتها، لكن لسه لحد دلوقتي أسعار الدواجن والبيض في الطالع.
دلوقتي قولولنا بتجيبوا طبق البيض بكام؟ ، وفي رأيكم مين المتسبب الحقيقي في ارتفاع الأسعار ؟
