الشعب .. الساريلياني !!
إمبراطورية ساريليان يا سادة هي إمبراطورية غنية جداً ، عندها موارد وثروات ومحافظ استثمارية وآبار نفطية وكل شي ، كل وافد فيها يتمنى يعيش فيها وما يطلع منها أبد ، و لو تخير الوافد بين العيش فيها وافد ولا مواطن راح يختار إنه يكون وافد وهو مغمض !!
هذي الإمبراطورية يا كرام تقدس الوافدين بشكل عجيب ، تحب تشوفهم سعداء ، وتحب تلبي كل احتياجاتهم الحالية والمستقبلية ، تكفل لهم التعليم والعلاج والأمن والاستقرار ، لا واذا يبون يجيبون اهلهم بعد يصيرون وافدين هم ماعندها مانع ، لاتعترف لا بتركيبة سكانية ولا طاقة استيعابية المهم تأمن للوافد سبل الحياة الكريمة .
هالإمبراطورية فيها عيب واحد بس ، عيبها يا محفوظ السلامة إنها ماتحب تشوف شعبها مرتاح لازم تنكد عليه ، يعني مثلاً تطلع عينه على ما يلقى وظيفة ، واذا لقى الوظيفة تلقى راتبها ربع راتب الوافد ، ولازم يقعد عشرين سنة على ما يطلع له بيت يسكن فيه هو وأسرته ، ويستمتعون لما يشوفونه مديون وحالته المادية تحت الصفر ، ومع إنها إمبراطورية تتغنى بالرأي والرأي الآخر ، إذا عبر مواطنها عن رايه تعتقله وتصادر حقه في إبداء رايه لأنه مواطن .
سنة من السنين إنتشر فيها وباء خطير ، تخلى عنها الجميع ، حتى الوافدين اللي قدمت لهم وميزتهم ، أغلبهم رجع لوطنه ، لأن بنظر الوافد اللي مافيه خير لوطنه مافيه خير ! مابقى لها الا عيالها ، اللي تطوعوا في شتى الميادين بدون مقابل ، بادروا بخدمتها بكل حب وولاء ونسوا كل اللي فات ، على الرغم من ان الامبراطورية تنظر لهم على أنهم قطيع !!
منو ما يتمنى يكون عنده شعب ساريلياني ؟!
سيف مفرج البرجس
